يوم العرس بالنسبة للعروس مو متل أي يوم… كل لحظة بتضل مطبوعة بالذاكرة، من أول ما تنبلش العروس التجهيزات لآخر رقصة. ومتل ما الفستان بيلعب الدور الأكبر، كمان شعرك هو التاج الحقيقي اللي بيكمل صورتك.
من بين أبرز صيحات هذا العام، يلمع خيار تسريحة الشعر المنخفض مع فيونكة ساتان كرمز للرقة والبساطة المترفة
وعم نلمحها عند أشهر العرايس والبلوغرز: الشعر المنخفض مع فيونكة ساتان. إطلالة بسيطة بس عن جد بتاخد العقل، وبتخليكي متل لوحة كلاسيكية أنيقة وما بتروح من البال.
ليش الشعر المنخفض بالذات؟
الكعكة المنخفضة أو حتى ذيل الحصان الناعم بيعطوا إحساس بالراحة والنعومة، وما في مبالغة بالحجم أو المثبت. يعني بتقدري تضحكي، ترقصي، وتتحركي طول النهار بدون ما يوقع شعرك أو يزعجك. غير إنو بيعطي تركيز أكتر على ملامحك وعلى تفاصيل الفستان—خاصة إذا كان بأكتاف مكشوفة أو ياقة عالية. وبتضلي محافظة على لمسة كلاسيكية تتناغم مع مختلف قصات الفساتين
وهون بتيجي الفيونكة الساتان…
الفيونكة الساتان مو مجرد إكسسوار، هي اللمسة اللي بتحوّل التسريحة من “حلوة” لمستوى جديد من الأناقة.. لمعتها الناعمة مع الكعكة بتعطي إحساس بالأنوثة والدلال، وبترجعنا لجو رومانسي شوي كلاسيكي وشوي عصري.
- الأبيض أو العاجي مناسبين للعروس اللي بتحب الكلاسيك.
- ألوان الباستيل، متل الزهري الباهت أو الأزرق السماوي، فيكي تجربيهن إذا بدك تكوني مميزة ومختلفة.
- وإذا بتحبي اللمعة، في فيونكات مزينة بكريستالات صغيرة بتعكس الأضوية بشكل ساحر.
كيف تختاريها على حسب الفستان؟
- إذا فستانك مليان شغل وتفاصيل، فيونكة صغيرة وناعمة بتكفي.
- وإذا فستانك سادة وشيك، جربي فيونكة كبيرة شوي لتصير هي نجمة الإطلالة.
- كمان لا تنسي تراعي شكل وجهك: إذا وجهك صغير، فيونكة ناعمة بتكون أرقى، وإذا مدوّر أو أعرض، الفيونكة الكبيرة بتعطي توازن.
سر صغير…
جربي التسريحة مع الفيونكة قبل بيومين أو ثلاثة من العرس، وخلي حدا يصوّرك فيها. أوقات الكاميرا بتورجيكي تفاصيل ما منشوفها بالمراية. هيك بتضمني إنو كل شي متناسق وبيعكس شخصيتك.
لمسات تكمل الإطلالة
التسريحة الناعمة مع فيونكة ساتان بتستاهل تفاصيل صغيرة تبرزها أكتر:
- الميك أب: يفضل يكون ناعم، بألوان طبيعية تبين إشراقتك، مثلاً عيون بظل ترابي أو لمعة بسيطة مع روج وردي فاتح أو نود. هيك بيضل التركيز على الفيونكة والشعر.
- الأقراط: الحلقان الصغيرة أو اللؤلؤ بتعطي توازن حلو، وما بتسرق الأضواء من الفيونكة.
- الحجاب (للعرايس المحجبات): فيكِ تختاري طرحة ستان أو شيفون ناعم يتماشى مع لون الفيونكة، وتخلّي الفيونكة تظهر من تحت أو على الجنب بطريقة أنثوية رقيقة.
- البوكيه: لو اخترتي فيونكة بلون باستيل، فيك تنسقي مع بوكيه بنفس التون ليكون كل اللوك متناغم.
وبالنهاية تذكري… الفيونكة مو بس قطعة قماش، هي رمز للأنوثة واللطف، وهي اللمسة اللي رح تخليكي بعيون الكل “أميرة” بيومك الكبير. 🌸